لن أركب قطارَ الوِحدةِ .. فقد سَبَقتنى .. وركبت قطارى .. يا أنتِ فوايد خوف ===========

الظاهر .. مكتوبلى اتونّس بالوحِده
زى ماكنت كتير باتونّس بيها معاكى
عارفه ياملاكى
أنا كنت ساعات بازعل من نفسى ..
عشان اصالحها
واتدارى ف ريحها ..
من الموت الساكن .
وارسم فراشات بتطير .. واحسدها
وأرجع اقيّدها
ألاقيها بتضحك ..
وبترسمنى ب اطير .
على طرف سرير
خالى من الصُحبه .. و م الأحلام !!
تقهرنى ..
أنام .
فاضل على أول شهر الفرح كتير
كل اللى قبضته صَرَفتُه ف أول يوم
مصاريف بالكوم
ماقدرتش اسدد غير وصل أمانه
بفوايد خوف م الدَيَّانَه
واعزم أحلامى
على تِفل القهوه الفاضل فى الفنجان
واشحت م البرد .. رحيلُه لساعه ..
أعيش دفيان
وأضُمِك .. وف عينك ما انقصش
واتعلق فيكى ..
كأنك عَشرة طاوله .. ومابتخلصش .
أشرب ببلاش
مشروب غشاش
وادخل ف الحرب .. تقولى بَطل
عارفه
مش عارف ليه حسيت بالعمر عَطَل ؟
والقلب اتكرَّع م الحواديت
واستكفَى هَطَل ؟
ولقيتك جنبى ومش موجوده !!
محدوده .. ف قلب حاجات .. محدوده !!
مش ممكن تبقى لأكتر ساعه
موجوده مسافة ولعة ولّاعه
مرهونه بحبة غاز
وانا روحى بتغرق فى الألغاز
ليه الفراشات
رسمتنى لوحدى .. مارسمتكيش ؟
ليه امّا ب اغنّى .. ب اغنّى ب قلبى ..
وصوتى مابيغنّيش ؟ .
ليه ف وجودِك مش ب اتنفّس ؟
وامّا ب تمشى
ب ارجع اتنفس تانى .. واعيش ؟ خالد عاطف أبو العزم ( من ديوان مطر اغسطس )