موال و أغنية
بقلم إبراهيم الأفندي
فيه ناس فى سوق الحياه باعت ضمايرها
وناس باعت ضناها وناس ..ربت ضنا غيرها
وناس تبيع المخلصين وتشترى خاين
اللى معاه إخلاص داست عليه الناس
فى السوق ما هوش باين
وناس عشان الطمع ترخص دِما غيرها
دي ناس فى سوق الحياه باعت ضمايرها
النص الغنائي
(سوق الزمان)
عايشين في سوق خَدَّاع
مليان ألم و خِدَاع
سوق الزمان يا عم
وكل شيء موجود
و كل شى معروض
الا الامان يا عم
فيه ناس تبيع نفسها
وتشترى زلها
وناس تبيع الناس
لا رحمة لا إحساس
والحب فينا ضاع
فى سوق ياناس خداع
سوق الزمان يا عم
وكل شيء موجود
وكل شيء معروض
الا الامان يا عم
سوق الحياة غدار
فيه البريئ ينهار
واللى معاه إخلاص
فارش فى آخر السوق
تدوس عليه الناس
وحياته آخر سوء
قلبه اتملى أوجاع
في سوق يا ناس خَدَّاع
سوق الزمان يا عم
وكل شيء موجود
و كل شيء معروض
الا الأمان يا عم
وناس إتقل خيرها
فى السوق بتبيع ضميرها
وتحلف ميت يمين
وتاكل حق غيرها
والظلم ليه ينتصر
والعدل ما له أثر
والحب فينا إنكسر
و الكل فينا خسر
تلقى إللى باع منباع
فى سوق يناس خداع
سوق الحياة يا عم
وكل شيء موجود
و كل شيء معروض
الا الأمان يا عم
سوق الزمان يا عم
ديوان المبدعين العرب 