آش الداني نطل …..
طليت على بير الخيمة لقيتو اوكح من ماه
عرفت بلي الدلو تخاصم مع القنبة لي جاراه
أو بلي عشبة الهالوك نشفات لو مجراه
أو الكانون رمادو مغطي الجمرة لي گادياه
طليت ع لمسيد لقيت لفقيه والطلبة هاجراه
عرفت بلي لقلم تفارق مع اللوحة لي مكتباه
طليت ع الحب الصافي لقيت الثقة خايناه
عرفت بلي بحر لغرام نكر شطآنو لي محوطاه
أو غول لبحر كلا مرجانو أو شلا حيتان تابعاه
طليت على النية لقيتها تابعة لعقل فهواه
عرفت بلي لعقل طاح أو قفالو ما صاب غطاه
طليت على سوق الدلالة شلا شطايرية جامعاه
عرفت بلي السلعة رخيصة أو ثمانها مسلفاه
أو بلي الشاري ماشاري أو ما جايب القفة معاه
طليت على الجار لقيتو ماعارف الجار لي حداه
عرفت بلي الجورة مشات ولي عطى الله عطاه
أو بي اللمة تفرقات أو بلي الوحداني ليه الله
كون يسحابلي گاعمة نطل أو نحيد للبير غطاه
حيث ما يقدر حد يگول راه راه أو الغوت أوراه
……. ( عبد العزيز الحساني ) ……..
ديوان المبدعين العرب 