صباح الخير يا مبروكه
يمو الساحه و الدراويش
تيابك باليه مشروكه
وأكلك ف العِياد كعابيش
وجوك مال… هَنا وجمال
يافقريه…. ولابسه الريش
وشُطَانِك تلات تِلوان
وإنتي مدينه والعمران
وإنتي آخر العنوان
وإنتي أول المهابيش
يا ماسكه العقل بالرآيا
وساكنه القلب جُوايا
ولما أنادي يا امايا
يقفش في قفايا شاويش
أنا موافق أكون زادك
أكون زيدك ..لا… وعبيدك
أهو حاجه مفيده بتفيدك
ولو أزهد وألبس خيش
مُنايا تفرَّطي حَبه
يا بِكر عفيه يا شبه
إدينا القِشف واللبه
طحينك هاتي متخبيش
طاب وزعي لقمتك بالعدل
إوعي تنافقي تدي الندل
دا أنا جادل شعورك جدل
وأنا اللي مزوقك دناديش
صفي القلب والنيه
وحاوطينا بحنيه
يا عكروته ياجنيه
خربشتي ف الزمان خرابيش
إسمك قلعه في العالي
وعيشتك عيشه م الغالي
منابنا رُبعك الخالي
بفتفوته من الملاطيش
تغَلِّي العيشه ملح وزيت
وفيكي ياما انا اترجيت
طفحت الكوته أنا ومليت
وبيَّا إنتي متحسيش
وهزيتي الفؤاد هزه
أشوفك مره متهزه
ف دنيا لا طعم ولا لذه
فيها الطيبه متعليش
لاهممني تغَلِّي ف البنزين
ولا ههمني القريشينات عَزين
همي تكوني قمره وزين
وزلطك نحمده وبالعين
مهو إنتي الغاليه يا مناره
مهو إنتي تاريخ وحضاره
يا قلب القلب يابداره
ياطاهره ياطُهر ياطَهاره
وفايته الكُل بجداره
إوعي ف يوم
………… تقولي مفيش
……..
سيف عثمان
ديوان المبدعين العرب 