……. خيالك دايما جنبي ……..
***********************
دايما دايما علي بالي
مانسيتك حتي ثواني
وان نمت بشوفك برضوا
في الحلم وجوه منامي
وخيالك دايما جنبي
ملازمني ساكن وجداني
وبفكر فيكي تملي
وانده باسمك لعيالي
وتشب خناقه في ثانيه
بالصوت يابني الحياني
وتقول طلقني كرهتك
وكفايه وسيبني في حالي
أنا أسمي سهام مش داليا
روح ليها وهاتها بدالي
خليها تربي عيالك
وتكونلك كل أماني
وانكر طبعا قدامها
معرفتي لداليا ليالي
أو أني ندهت بأسمك
أبدا خالص في زماني
مش مره ده ألف وميه
يتكرر ده قدامي
وانا اكرر نفس المشهد
مين ينقذني بعشماوى
يظهر نسياني حبيبتي
هيكون مرهون بزوالي
لما اسكن جوه التربة
وتصاحب لي أعمالي
مين قال انا عايز أنسي
فرحي وحزني وأشجاني
ده انا عايش ولدلوقتي
علشانها بقيت ايامي
بحلم وانا صاحي بداليا
وانها بقيتلي حلالي
وان انا من شهدها بشرب
والناس كلها حسداني
يارب ب طه محمد
حقق أملي واحلامي
في الدنيا أو في الأخرة
أجمعني بحلمي الغالي
واغفرلي وداليا ذنوبنا
انا برمي عليك أحمالي
بقلم .. ياسر فؤاد الجدي
الخميس .. ٢/٩/٢٠٢١
ديوان المبدعين العرب 